»»
ويتجدد اللقاء بين الفينة والأخري مع مختارات من إبداعات أدباء ومواهب أرض الكنانة..
وقد أهدي الأديب الشاعر معوض حلمي الملقب ب”الفلاح الفصيح” قصيدة من ديوانه الجديد “الوديعة”،والذي سيصدر حديثا بعد الانتهاء من طباعته..
ديوان “الوديعة”،هو الديوان الثاني عشر للفلاح الفصيح ،والفائز بالمركز الأول في مسابقة “ملتقى النهار”. الأدبي لهرم العامية المعاصرة الشاعر الكبير ابراهيم رضوان.
????
بحر المعاني
بحر المعاني اختلط ، هايج وزاد ف أساي
عقد الأصول اتفـرط ، والنور يعيش إزاي
من بين حروف الأمل طرحت شطوط المنى
وانا شعري طارح غنا ، مايلقش غير للناي
مشيك مع الكداب ، هايزيد في أوزارك
خلي الكلام بحساب لو شوفته أو زارك
واوعاك تلوم الزمن لو هاتجاريه ف الزور
بكره يجيك الدور ، ويذيع ف أسـرارك
إوعاك تقول مؤتمن في زمان ماليه العيب
وإياك تسيب الغنم ترعى ف زمام الديب
مهما الجروح بتطيب بتسيب أثر وعتاب
زي اللبن لو راب ، مايعودشي تاني حليب
مش كل غيط اتحرت ها يخضر المبدور
ولا كل جرح اتفرط هيطيب بزار وبخور
قـفل بيـبان الـدار جمـدها بالترابيـــس
الندل طبعه خسيس ، بيعس بين الدور
فيه ناس تخلي الدموع تجري كما ل انهار
وناس تقيد لك شموع ع السكه ليل ونهار
وناس بتعـمل عمل علشان يموت الأمل
وناس يجيـها الأجـل يلـقاها م الأطهار
مش كل سكر داب يفضل حـلاه ويدوم
ولا كل ظالم تاب هايحس خوف مظلوم
ولا كل عود إخـضر هايجيب سـبل غـله
ولا كل نوع عله هايكون دواه معـلوم
نكتب حروف الشعـر ع العفه ويا الـشـرع
لكن نشـوف الـفـعل الجـدر غـير الفـرع
نبدر تقاوي الفضيله ف أرض بور كالحه
النيه مش صالحه فيموت ف مهده الزرع
للمــوت ميـعاد إنما بيـلم إنـس وجـان
رزق العباد ف السما ماتخافش من سجان
فإياك تعـيشها مـهان وتمد تطـلب عطا
شوف الجدار إن وطى بيطمع الفسـدان
إمسح دموع الأسى وبلاش ملام وعتاب
كل اللي فات واتنسى عيشناه ألم وعذاب
إبدر غيطانك فرح ، تطرح محبه ونور
وإياك وقول الزور ، وإوعاك من الكداب
كل اللي عاشوا الألم باب الفرح سـدوه
بيخاصموا نبض القلم وبجهلهم قصفوه
راحوم يجيبوا الفرح لقوه خلص مالسوق
واللي كواه الشوق مايتوبش لو قتلوه
إغفر لناسك غلط طبطب وداوي جروح
قرقش عشانهم زلط إوعاك تقول مجروح
عـمر الخـصام والزعـل مايغـير الأحـوال
ربك عليم بالحال هو اللي بيشفي الروح
ماتقولي فين الجدود وفين ميراث الغيط
والقبر فيه الدود ، خلى الجـلود فتافيت
وبـرغـم زاد النـور لـسـاه مابينا قابـيل
بنلم كل قتيل ، ونعـبي في التـوابـيت
رغـم الآسى صابني والعـيشه ع النوته
بحـر القـريض سـاقني خـلاني حدوته
شوفت المرار زايد في الحي والحاره
فـقلـعت صــباره ، وزرعـــت لي تـوته
فاكر زمان الهـنا والغـيط ملان بالناس
وناس بتعزء هنا ، وناس على الملاس
وابويا اللي كان بيدور ، ويدور الطنبور
كات هدمته الكاستور أغلى من الألماس
كترت هموم الزمن والشيله تقل جبال
ضهر الأصيل مؤتمن ، ولصحبته شيال
فاإياك تصاحب ردي وقت المحن بيخيس
ويبان فناسه خسيس لو كان بعمه وشال
البـخـت لو مـال ، بيـمـيل القـســـــــمه
والرزق مش مال ، ولا جـمـع ولا قسـمه
الرزق وش باشوش ، وقلـب فيه الرضا
تملك أراضي وفضا ، وتطيب لك النسمه
زنبيل زمان اتملى ، كان بالحنان بيخر
دلوقتي صابه البلا ، عباه وسرسب مر
الدار فريح الدار ، بس البيبان سكه
النيه مش سالكه ، ومعادش حاجه تسر
مش كل واحد صدق ، وعاشها بالمعدول
ولا كل وعد اتوعد يوفيه جميل القول
ولا كل ظلم انتشر يقدر يدوس الحق
ولا كل توب اتشق يرمي العتب ع النول
????
يذكر أن الشاعر معوض حلمي ، هو ابن قرية منشأة بطاش تمي الأمديد بمحافظة الدقهلية،ومن رموز شعر العامية المصري .
صدر له عدة دوواين منها، عنقود مشاعرك ، قلبي إمام، رباعيات الفلاح الفصيح عن دار الرضا للطبع والنشر.
كما صدر له ديوان “ع الحصيرة” الفائز بالمركز الأول في مسابقة الشيخ مبارك المطوع لشعر العامية عن دار ميتابوك للطباعة والنشر، وديوان مراكب ضميرك “مربعات” عن دار ميتا بوك للطبع والنشر.
وله عدة اعمال ودوايين أخري تحت الطبع.
إخلاء مسؤولية إن موقع بالبلدي يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
"جميع الحقوق محفوظة لأصحابها"
