مصر في السنين اللي فاتت كانت واحدة من الدول الرائدة في زراعة القطن طويل التيلة، ولكن حصل تراجع في زراعته بشكل كبير ، وحاليا الحكومة عملت خطة لإعادة زراعته وبمساحات كبيرة.. ياتري اية اسباب الموضوع ده.. واية العوائد الاقتصادية اللي هترجع علي مصر من اعادة زراعة القطن.
مصر من سنين طويلة كانت واحدة من الدول الرائدة في زراعة محصول القطن وخصوصا القطن طويل التيلة، وده واحد من انقي وافضل أنواع القطن علي مستوي العالم، وبيدخل في اغلب الصناعات سواء كانت صناعة الملابس ده غير صناعات الغزل والنسيج والزيوت والأعلاف.
في الفترة الأخيرة حصل تراجع في زراعات القطن، وده للاسف خلي مصر تتجه لاستيراد بعض أنواع القطن علشان تغطي الطلب المحلي للصناعة، خصوصا أن مصر واحدة من الدول الرائدة في صناعة الملابس وبتصدر كميات كبيرة وبأرقام دولارية كبيرة لعدد من دول العالم.
طيب اية اللي بتعمله الحكومة علشان تنشط وتتوسع في الزراعات المستهدفة؟.
الحكومة في الفترات الأخيرة بدأت تعمل حاجة اسمها سعر استرشادي، ود لتعريف المزارعين بأقل الأسعار اللي الحكومة هتشتري عليها المحاصيل، وده بيدي حافز للمزارع أنه يزرع أنواع محددة من الزراعات خصوصا أنه بيكون عارف سعرها قبل ما يحط البزرة بتاعتها في الأرض، وكمان بيكون محدد مكسبه من المحصول هيوصل لكام ومش هيخاطر بزرعة معينة ممكن يخسر من وراها.
مش كده بس لأ ده كمان الحكومة بدأت تشجع الفلاحين علي أنواع محددة من الزراعة من خلال توفير أسمدة وبذور في الجمعيات التعاونية يعني مثلا في دعم بأسمدة زيادة الحكومة بتحددها لمحاصيل عن غيرها من باقي المحاصيل الثانية، ده غير خدمات الإرشاد الزراعي، وده بيشجع الفلاح علي زراعة المحاصيل اللي الحكومة مستهدفها، وده اللي بتعمله الدولة في القطن، وده غير كمان تطوير مناطق استقبال محصول القطن من الفلاحين، وكمان تدبير صرف العوائد المالية للمحاصيل للفلاحين وميبقاش في تاخير في صرف فلوس المحصول .
الحاجات اللي عملتها الحكومة دي كانت بتوجيهات مباشرة من الرئيس عبد الفتاح السيسي واللي أصدر توجيهات لاستعادة مكانة القطن المصري عالميًا، ودعم الفلاح المصري وتوفير استقرار اقتصادي له، خصوصا في ظل الأزمات العالمية.
الرئيس السيسي وجه الحكومة كمان بتحفيز المزارعين على توسيع المساحات المزروعة بالقطن، ومصر حاليا بتزرع أكثر من 300 ألف فدان من القطن عالي الجودة.
السنة دي الحكومة حددت سعر محصول القطن بـ 12 ألف جنيه للقنطار طويل التيلة، في محافظات الوجه البحري، و10 آلاف جنيه للقنطار متوسط التيلة في الوجه القبلي، وده سعر كويس للفلاح، وكمان هيكون خطوة مهمة لدعم صناعة الغزل والنسيج واللي مصر بدأت تاخذ فيها خطوات مهمة لاعادة ريادتها مصر تانية بعد عمليات التطوير اللي حصلت ولسه شغالة في تطوير مصانع الغزل والنسيج .
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
