هو فعلا فيه تعويم جديد للجنية زي ما ناس كتير بتقول الفترة الأخيرة؟ وإزاي لسه فيه كلام عن التعويم رغم ان البنك المركزي أعلن من مارس 2024 تحرير سعر الصرف؟ ولو مفيش تعويم ايه اللى هيحصل لسعر الجنيه قدام الدولار؟ وليه صندوق النقد لسه بيتكلم عن تحرير سعر صرف العملات الأجنبية فى مصر؟
في مارس 2024 البنك المركزي المصري قرر تحرير سعر الصرفظ.. وده معناه إن قيمة الجنيه بقت تتحدد بناءً على العرض والطلب في السوق.. من غير تدخل مباشر من البنك المركزي أو من أي جهة تانية فى الدولة .. ورغم كده لسه فيه ناس بتتكلم عن ان هيكون فيه تعويم جديد للجنية.. لكن المؤكد ان خلاص مفيش حاجة تاني اسمها تعويم للعملة المصرية
طب ليه بنقول انه مش هيكون فيه تعويم تاني؟
السبب ببساطة إن التعويم حصل بالفعل في مارس 2024.. وبالتالي مفيش داعي لتعويم جديد.. حاليًا سعر الجنيه بيتحدد بحرية وفقًا لآليات السوق وده بيضمن استقرار أكبر في سوق الصرف.
طب هل ده معناه إن سعر الجنيه ثابت مش هيتغير؟
مش بالضرورة سعر الجنيه ممكن يتحرك بناءً على العرض والطلب.. لكن التحركات دي هتكون طبيعية ومش بشكل مفاجئ أو كبير زي ما كان بيحصل قبل كده.
نيجي لسؤال مهم .. هو إيه اصلا اللي بيحدد سعر الجنيه ؟
بعد تحرير سعر الصرف بقى العرض والطلب هما العاملين الرئيسيين في تحديد قيمة الجنيه مقابل العملات الأجنبية.. يعني لو زاد الطلب على الدولار ممكن سعره يرتفع والعكس صحيح
هل ممكن نشوف تحركات كبيرة في سعر الصرف؟
من المتوقع إن التحركات في سعر الصرف تكون أكثر استقرارًا دلوقتي.. البنك المركزي نجح في القضاء على السوق السوداء ومنع المضاربات.. وده ساهم في تقليل التقلبات الكبيرة في سعر الصرف.. يعنى من الآخر فكرة انك تنام وتصحا تلاقي الدولار سعره قفز قفزات كبيرة مش هيحصل.. وارد يكون فيه تحرك لكنه هيكون تحرك هادي وبطيء
وإزاي البنك المركزي قضى على السوق السوداء؟
بفضل تحرير سعر الصرف.. الفجوة بين السعر الرسمي والسعر في السوق السوداء اتلاشت تقريبًا.. وده خلى الناس تتجه للتعاملات الرسمية بدلًا من السوق الموازية.. وبالتالي قل نشاط السوق السوداء بشكل كبير
خلاصة الكلام.. مفيش تعويم تاني للجنيه المصري لأن البنك المركزي حرر سعر الصرف بالفعل في مارس 2024. دلوقتي، السوق هو اللي بيحدد سعر الجنيه بناءً على العرض والطلب، ومع القضاء على السوق السوداء ومنع المضاربات، من المتوقع إن سعر الصرف يكون أكثر استقرارًا في الفترة الجاية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
